അയാളൊരു മാന്ത്രികനാണ്
ഒരു കുന്നിനെയവൻ താഴ്വാരമാക്കുന്നു,
കടലിനെമരുഭൂമിയും, മരുവിനെ
തിരയിളകുന്ന കടലുമാക്കുന്നു.
വെറുപ്പുകൾ ഇഷ്ടങ്ങളും,
ഇഷ്ടങ്ങൾ ഇഷ്ടകേടുകളുമാക്കുന്നു.
പൊഴിഞ്ഞു വീഴുന്ന ഇലകൾ,
വേരുകളിലൂടെ സഞ്ചരിച്ചു പിന്നെയും
പുതിയ ഇലയായി പിറവികൊള്ളൂന്നതും,
ഈയൊരു രാത്രി ഇരുട്ടി വെളുക്കുമ്പോൾ,
ഇന്ന്, ഇന്നലെയാകുന്നതും.
അയാളുടെ ജാലവിദ്യ..
നാളെ ഞാൻ ഉണർന്നില്ലെങ്കിൽ
ഞാൻ ഒരു മനുഷ്യനിൽനിന്നു
ഒരു ഓർമ്മമാത്രമായി മാറുന്നതും
അയാളുടെ മറ്റൊരു മഹേന്ദ്രജാലം
വരൂ, ഞാൻ ഒരു ഇന്നലെയായിമായുന്നതു വരെ
ഈ മാന്ത്രിക കാഴ്ചകളിലൂടെ നമുക്ക്
കൈകോർത്തുനടക്കാം...